أرشيف الكاتب: Ali T

عن Ali T

1 2 3 4

طريقة تجفيف الورد ، واستخدمه طعام للقوارض

صباح او مساء الورد بتوقيتكم و رمضان كريم

مدونة اليوم بتكون بسسسيطة وَ جميلة بما انو عندنا مزرعتنا الصغيرة وفيها انواع من الورد قررت اخذ كمية اجففه لعدة غرض منها استخدمها كطعام جاف لقوارضي الشانشيلا لأن يحبون الورد جداً ويعتبر جزء من نظامهم الغذائي ..

و الورد المجففه له فوايد كثيره يمكن تستخدمونه للتزين والديكور ، الوصفات الجمالية يمكن تزينون منه زيت ورد للشعر او للوجه على حسب احتايجكم، بالفترة الاخيرة الناس صار يستخدمون باقات الورد المجففة بالهدايا بدال الورد الفريش، بالغالب اشوف انا ان الورد المجفف خلال السنوات الجاية بيكون اكثر انتشاراً و رغبة بالتزين وبالديكور ايظا.

فا يلا خليكم معاي بهذي الجولة المعطرة 🙂

هذي طبعاً حصيلتي بعد التنشيف، حفظتهم بعلبة بلاستك مع اني افضل الزجاج لكن هذا الموجود حالياً لأن ماحبيت اشتري شي من برا بسبب انتشار فايروس كورونا هذي الايَام 🙁

هذا الورد الطائفي مشهور عندنا بالسعودية ومن اسمه من الطايف وفيه مزارع ضخمة جدا بمدينة الطائف وفيه مهرجان سنوي كذالك. عموماً مشهور الورد الطائفي برائحته العطرية الجميله ويصنع منه ماء الورد.

 مقص لقص الورود و قفاز حماية من شوك الورد ..

هذا عش عصفور مهجور، اعتقد لطائر البلبل والله اعلم ..

ورد ابيض بدون رائحه

 

هذي حصيلي الكاملة ورد من كذا نوع و صبار طبعاً الصبار اخذته عشان روتين ثاني، اذا فضيت راح انزل مقالة خاصه فيه.

 

هنا بعد ما غسلت الورد بالماء البارد ونشفته زين وحطيته زي ماهو واضح بشبك تصفية حديدي عشان يدخل الهواء من كل صوب وحطيتهم بالشمس لساعات طويلة مع مُراعة تقليب الورد.

 

الصورة من هذي الناحية توضح اكثر ايش اقصد ..

هذي متحمسة افتح القفص واعطيها الورد

كل واحد سعيد بحصته من الورد المجفف 🙂

وما ننسى هذي الرصاصية الجميلة ..

ما شاء الله وبالعافية.

وبس وصلتم لاخر المقالة البسيطه جدا وكلها ريحة ورد :p

دُمتم بَحب.

 

 

زملائك بالعمل ليسُ اصدقائك

صباح او مساء الخير بتوقيتكم ..

اتمنى ان الجميع سعداء وفي احسن حال ..

الطيبة الزايدة مع الجميع :

مقالي اليوم عن الاشخاص المتواجدين بالعمل معاك، والي اقصده الاشخاص الي حولك سواء بنفس الغرفة الي معاك بالعمل او أنكم تتشاركون بعض الاعمال في بعض الاحيان ..

بعد القبول في وظيفة الاغلبية يبغى يبين انه له جانب ايجابي من ناحية شخصيته الي هو “الطيبة” وهذي فطرة الانسان الطبيعية فالرسول صلى الله عليه وسلم قال ” اتقوا النار ولو بشق تمرة، فإن لم يكن فبكلمة طيبة” تأمل هذا الحديث وركز فيه لك ان تتخيل انك يوم الحساب يمكن راح تبعد عن النار بسبب كلمة طيبة فقط ؟ فمابلك لو انك شخص مُسالم وطيبتك ب افعالك مو بس بلسانك!! تمتعك بالطيبة كلاماً وفعلاً خصله فيك جميلة جداً لكن! لا تخليها سبب انك تكون مُنفتح للجميع بالعمل! لأن مو كل النَاس بالعمل بنفس تفكيرك ولا بنفس ميولاتك و حتى بذوقك، فعشان كذا لازم تكون مُنغلق على نفسك ركز فقط بعملك الي مطلوب لك انك تؤديه قبل نهاية اخر ساعه بالعمل، وفكر كيف تطور من نفسك بالعمل، صدقني هذا المطلوب منك بالعمل. مو مطلوب منك تكون صداقات بين المتواجدين حواليك ولا مطلوب منك توريهم اهتمامتك بالحياة او ايش هوايتك!!

الاشخاص السيئن معك بالعمل :

 بمجرد انك ما تكون مُنفتح للي حولك راح تبدا المشاكل تدريجياً ..

ايه صح انت الشخص الطيب مع الجميع، وكثير الكلام معهم والي اتوقع ١٠٠٪ انك تشتري لهم القهوة على حسابك طالب منهم يحبونك وتكون الشخص الطيب بنظرهم.

بتكون بلا قيمة وبتكون سهل للاشخاص المصلحيجة الي يبغون يستغلونك، ناهيك عن الاشخاص الحقودة الي بتواجهم بعملك بتكون هدف سهل لهم.

لان بتواجد شخصيات كثيره بالعمل منهم كالتالي: الحقير، المريض نفسياً، الكذاب، الغيور جدا، الحاقد ، المصلحجي و و و … وبالمقابل بتحصل اشخاص لطيفين وطيبين مثلك. لكن مو مطلوب منك برضو تكون صداقات معهم.

لان هذي بيئة عمل وتحقيق اهداف مو مو وقت تعارف وتكوين صداقات 🙂

كل الي عليك هو انك تتجاهل السيئين لان كل واحد له نوايه ضدك، فلا تعطي مجال لأحد ابدا.

ايش اللي عليك تسويه ؟

قاعدتين بتكون في بالك من اول يوم وظيفي لك وظرورية تطبقها بكل احترافية الي هي :

  • زملائك بالعمل ماهم اصدقائك.
  • لا تتكلم الا اذا اضطريت فقط.

.

هذي مقولة مشهورة عن الاجانب ومعناها ليس الكل بمقر عملك هو صديقك. انجز عملك، واحصل على راتبك واذهب للمنزل.

5 اشياء عليك تطبقها معع الاشخاص في عملك :

  • تجااااهل تماما اي تصرف او تعامل سئ، لأن زي مَا يقولون “الحقران يقطع المصران” لووول p;
  • ابداً لا تتكلم عن احد مهما شفت اشياء ما تعجبك فيه.
  • خليك البالغ العَاقل بين الجميع.
  • قدم الخير بالعمل شوف اذا فيه احد يحتاج اي مساعدة بشي مو عارف ينجزه وانت تقدره تفيده فيه، مُو تسوي شغل احد!
  • ابداً ابداً ابداً لا تعطي احد حساباتك الشخصية بالسيويشل ميديا، راح تكون معرض للمراقبة او النقد والتدخل للحياتك الشخصية. بكل بساطة اذا احد طلب منك حسابك انستقرام او سناب قله ما عندي انا مكتفي بالواتسب فقط. حتى لو الشخص شافك تستخدم اي برنامج راح يفهمها ويبتعد.

وبكذا انهيت مقالاتي بشكل مُبسط بالرغم كان عندي كلام كثير لكن حبيت اختصر عشان توصل الفكرة والرسالة الي بقدمها للي يقراء كتباتي .

هذا المقالة غير منقولة، لذا يُمنع نقلها او استخدامها دون اذني.

عُذراً عالإطاله ..
دُمتم بَحب.

قارض الشانشيلا

صباح / مساء اللطافة .. هذي أول تدوينه بموقعي، حياكم جميعاً وان شاء الله تكون بداية خير للجيمع وهدف لي عشان اوّثق فيها اهدفي و افكاري وثرثرتي بعد.

فار ؟ ارنب ؟ سنجاب ؟ ايش هذا ؟

اول ما يطالع الشخص بهذا الكائن يوصفه بهذه الكلمات! ما ألوم اي أحد لانه غير متوفر بكثرة عندنا بالسعودية و في دول الخليج، بالاصح نادر عندنا فقط لكن! متواجد بكثرة بالدول الأجنبية مثل امريكا،اوكرانيا الصين واليابان. نرجع للكائن اللطيف اسمه العلمي الشانشيلا من فصيلة القوارض مثل الارانب و السناجب والهامستر كلهم تحت تصنيف فصيلة القوارض. موطنه الاصلي في جبال الأنديز الي تقع بجنوب امريكا والي معروف فيها ببردها القارص وجمال طبيعتها. يعيش الشانشيلا في جحور وشقوش الجبال. الي يميز الشانشيلا شكله الجميل الكيوت اصغر من الارنب بالحجم ويميزه ايظا فروه الناعم جدا واللي يعتبر انعم و اغلى فرو بالعالم.

صورة من جبال الانديز بجنوب امريكا

 

أنواع واشكال الشانشيلا:

في الاصل الشانشيلا شكل ولون واحد الي هو عايش بموطنه الأصلي لكن لم اكتشفوه علماء الطبيعه والحيوان اخذوه وبدو بالتهجين، اتَّكأ العلماء بعلم الوراثة للحصول على الشكل الحالي الي هو معروف ويتربى بالبيت وينباع بمحلات الحيوان حالياً. وبالعلم انتجو من الشانشيلا اللوان، اول لون انتجوه الرصاصي الأصلي بدرجاته لكن مع الوقت انتجو اللون الابيض الألبينو والابيض الهملايا والبني بدرجات والاسود ايظا. 

 الشانشيلا المعروف وموجد بمحلات الحيوانات :

 

سلوك الشانشيلا :

الشانشيلا من اكثرة الحيوانات الاجتماعية سواء مع بعضهم البعض او حتى مع البشر، نادراً ما يصير بينهم مضاربات الا بالنادر مثل فترة حمل الانثى ومثل فترة طلب التزاوج. حيوانات ليّلية يعني نشاطها بفترة المساء اكثر. الشانشيلا الي عندي لاحضتهم نشطين دائماً في فترة المساء وبالصباح بعد لكن! في فترة الظهر نايمين واغماء 🙂 

على العموم هم نشيطين ويحبون يطلعون من القفص عشان يجرون وينطون على كيفهم، واذا انحبسو بالقفص راح يبدون بالانزعاج ويعطونك اشارات معناها خلاص نبي نطلع خرجنا نلعب. 

الشانشيلا من انظف الحيوانات من المستحيل تشم فيها رائحة ابدا، ظروري توفر تراب بركاني يستحمون فيه لأن بطبيعتهم الأصلية في جبال الأنديز الي هي عبارة عن قمم بركانية. فالتراب البركاني يساعد علئ تنظيف فروفهم الجميل ويحميهم من الفطريات، لأنه ينشف فروهم ويعطي لمعة صحية. ف هذي بالنسبة لي اهم نقطة بسلوكهم اذا ما قدرت مستقبلاً توفر هذا الشي لهم!! لا تشتريهم وتظلمهم. 

الذكور بالعادة أولف وأحن بالتربية سهل ترويضهم عكس الاناث يكون طبعهم شقي ومتمردين ويكون فارضين شخصيهم اكثر من الذكور (عن واقع تجربة)، الي حاب يربي شانشيلا واحد فقط مستقبلاً انصحه يكون جنس الشانشيلا ذكر.

يمكن تعليم الشانشيلا على اللتربوكس يعني مثل القطط، يعني صندوق مخصص يقضون فيه حاجتهم وتعليمهم سريع جدا مع شوية صبر لاني فعلاً لاحظت عندي بطبيعة الشانشيلا يقضون حاجتهم بمكان او مكانين معين بالقفص وبالعادة يكون بالزوايا، ولاحظت مو بس الشانشيلا معظم القوارض مثل الارانب والهامستر يقضون حاجتهم بمكان معيّن. 

 

غذاء الشانشيلا :

أعتبر هذي اهم نقطة بالتدوينة للي حيربي شانشيلا! لأنهم لابد لهم غذاء معين و مُراقب بعناية. ليش قلت كذا؟ لأن الشانشيلا حساسين جدا من ناحية الغذاء ولازم يكون اكلهم جاف. راح اختصر الموضوع ببساطة خصوصا للمبتدئين، لابد ان يكون اكل الشانشيلا مكون من ثلاث اشياء رئيسية الي هي: البرسيم، مكعبات البرسيم ، زهور مجففه والماء فقط.

الموضوع مو صعب! البرسيم بمحلات الحيوانات، ومكعبات البرسيم لابد تكون خاصه فيهم للأسف مستحيل نحصلها بمحلات السعودية 🙁 بالعادة اخذهم من الكويت او اطلبهم من موقع امازون. 

الاشياء الممنوعة اكلها للشانشيلا:

الخضروات الطازجة ليه؟ لان فيها الكثير من الرطوبة الي تسبب الانتفاخ وبالتالي هذا يمنع مرور الغازات وقد يؤدي في النهاية إلى الوفاة بسبب تراكم الغاز، نهايكم عن الاسهال الي يسببه لهم. لإن طبيعتهم يأكلون الاكل الجاف فقط. 

الفواكه الطازجة ليه؟ نفس ضرر الخضروات الطازجة و نفس الشي الفواكه المجففه تحتوي على كمية سكر عالية راح تأذيهم على المدى البعيد. مافي مانع ياخذون فواكه مجففه بين فتره وفترة بكميات قليلة كنوع من التدليع لهم ؛) .

المكسرات والبذور ليه؟ لانها تحتوي على نسبة دهون عااالية راح تقتل حيوانك بصمت وانت ماتدري ايش سبب المشكلة.

تكاثر الشانشيلا :

من بعد ٦ الى ٧ شهور يبلغون الشانشيلا وبيكون تزاوجهم بإي وقت بعض الشانشيلا يبدون تزاوج بحدود عمر السنه، والي حاب ينتج الشانشيلا لازم يكون الزوج عمره بحدود السنه تقربيا، لأن لو كمل الشانشيلا عمر السنتين بدون شريك او تزاوج من قبل! راح يكون مستحيل انه ينتج له. الجدير بالذكر ان الشانشيلا ليس لها موسم تزاوج معيّن فترة تزاوجها طول السنة وحتى بعد ولادة انثى الشانشيلا يمكن لها انت تتزاوج مباشرة

مدة حمل الشانشيلا طويلة جدا تعتبر اطول مدة حمل بالقوارض واكثر من معظم بقية الحيوانات بعد!! تصل مدة حمل انثى الشانشيلا من ١١١ يوم الى ١٢٠ يوم تقربياً ٤ شهور تقل ولا تزيد المدة. تولد الانثى من ١ الى ٣ كتس فقط. وبالغالب تولد ١ او ٢ كتس. الكتس يعني صغار الشانشيلا يطلق عليهم كتس kits . 

خلال فترة الحمل يجب عزل الانثى عن الذكر ويفضل تكون لوحدها بقفص، لان اذا حاول الذكر يلقح الانثى في فترة حملها راح يسبب موت للأطفال وهم بداخلها وراح تولدهم اموات، ويكون بسبب إجهاضها.

بالنسبة لتحديد جنس الشانشيلا بيكون صعب اول شهرين لأن بسبب تشابه جهازهم الجنسي تقربياً الذكر والانثى نفس الشي، وحتى وهم كبار بيكون شوي صعب على الي ماعندهم خبرة.

هذي صورة من تصويري لشانشيلاتي بعمر ال ٥ شهور تقربيا، لاحظو المسافة بين الجهاز التناسلي و فتحتة الشرج فرق المسافة واضح.

شكل جهاز التناسلي لشانشيلا بالاناث مخروط رحمي، بينما عنده الذكر مخروط قضيبي وخصيتان (مرئيتان في بعض الأحيان). بالذكور فتحة الشرج بعيدة عن القضيب. في الإناث لا توجد مسافة تقريبًا بين فتحة الشرج ومخروط الرحم.

هذي اخر نقطة راح اتكلم فيها عن قارض الشانشيلا بهذي التدوينة، كرّست نفسي لهذا الموضوع وللأمانه لم اعطي الموضوع حقه لكن حبيت ابين للعالم العربي انه في اشخاص مهتمة في الشي الغريب والنادر مو بس كذا! ناس تستند علئ العلم بهذا المجال وتثقف نفسها وتساعد غيرهم.

هذا المقالة غير منقولة، لذا يُمنع نقلها او استخدامها دون اذني.

عُذراً عالإطاله ..
دُمتم بَحب.